14 ліпеня будзе роўна год з моманту затрымання праваабаронцаў | Вясна | Брэст

14 ліпеня будзе роўна год з моманту затрымання праваабаронцаў «Вясны» Алеся Бяляцкага, Валянціна Стэфановіча і Уладзя Лабковіча

14 ліпеня 2021 года да іх і іншых вясноўцаў прыйшлі з ператрусамі. З таго дня трое вясноўцаў знаходзяцца пад вартай, а мінскія офісы «Вясны» апячатаныя. Алеся, Валянціна і Уладзя абвінавачваюць у «нясплаце падаткаў у буйным памеры». Вясной 2021 года таму журналісты задалі ім пытанне: што рабіць беларусам, калі пасадзяць праваабаронцаў? Вось што яны адказалі тады:

Алесь Бяляцкі:
«Сапраўды, нас могуць вельмі моцна рэпрэсаваць, нас могуць пахаваць па турмах, выгнаць з краіны, але ў гэтай сітуацыі толькі мільёны беларусаў могуць абараніць свае правы. Таму вельмі важна, каб гэтае жаданне і настойлівае патрабаванне ў выкананні правоў, якія датычацца кожнага грамадзяніна, каб гэтая просьба і ціск, ішоў ад усяго беларускага грамадства».

Валянцін Стэфановіч:
«Гэта такая апакалептычная карціна, але яна калісьці была ў нашай гісторыі: Савецкі саюз, пачатак 80-х, разгром савецкага праваабарончага руху, калі практычна ўсіх праваабаронцаў перасадзілі. І такіх праваабаронцаў, якія бы дзейнічалі на свабодзе, фактычна не засталося. Такое, напэўна, можа здарыцца. Што рабіць беларусам? Бараніць сябе. Увогуле тут трэба зразумець, што, акрамя нас саміх, ніхто не зможа нічога змяніць у гэтай краіне».

Уладзь Лабковіч:
«Думаю, мы будзем побач, нават калі будзем сядзець. Ёсць шмат міжнародных арганізацый, якія нікуды не дзенуцца. Ёсць ужо вялікая колькасць праваабаронцаў, якія былі вымушаныя з'ехаць. Паверце, калі пасадзяць адных, з'явяцца іншыя. Людзі, якія будуць бараніць іншых, знойдуцца заўсёды. І калі гэта будзе не "Вясна", таму што ўсе будуць сядзець, то з'явяцца іншыя. Калі не дай бог такое здарыцца, то можа гэта будуць тыя, каго мы вучылі на нашых школах па правах чалавека. Заўсёды з'явяцца людзі, якім важна пытанне справядлівасці, права і бараніць тых, хто апынуўся ў сітуацыі поўнага беспраўя з боку ўладаў».

Як праваабаронцы «Вясны» ратуюць беларусаў — фільм «Радыё Свабода»
СІЗА-1, 220030, Мінск, Валадарскага, 2 (Аляксандру Віктаравічу Бяляцкаму, Валянціну Канстанцінавічу Стэфановічу, Уладзіміру Мікалаевічу Лабковічу)
Як падтрымаць зняволеных праваабаронцаў «Вясны»