2022-06-06 10:42:56
Вітанкі, сябры. Пачынаем гэты тыдзень допісам пра падкасты па-беларуску.
Вы, верагодна, бачылі і ўжо, мабыць, слухалі Белліт¹ і Так склалася гістарычна, таму мы вырашылі прапанаваць вам штосьці меней папулярнае, але якаснае і цікавае.
1. Глыбінны народ
Гэта падкаст Цэнтра новых ідэй пра тое, як і чым жывуць беларускія рэгіёны, якія ў іх праблемы і ў чым яны, наадварот, крутыя. Эканоміка, спорт, навука ды іншыя тэмы ў размовах з экспертамі пра Беларусь.
2. Малус
Падкаст, у якім прафесійныя акторы агучваюць апавяданні і літаратурныя тэксты пісьменніка Кірыла Стаселькі. Захапляльныя і атмасферныя пастаноўкі ды чытанні. Больш інфармацыі ў Тэлеграм-канале аўтара.
3. VANDRA
Падкаст праекта VANDRA пра турызм у Беларусі. Гутаркі пра прыроду, лакальны турызм і людзей да яго датычных. Напрыклад, у апошніх эпізодах аўтар абмяркоўвае з гасцямі Будслаўскі касцёл, Палессе і габрэйскую спадчыну Беларусі.
4. Ружовы падкаст
Падкаст Тэлеграм-канала Ружовая купіна, у якім рэдактар Аляксей распавядае пра якасць праектаў Марвел, што выйшлі летась, дзеліцца сваімі ўражаннямі ад фільма "Доктар Стрэнж у Мультысусвеце Вар'яцтва" і серыяла "Месяцовы Рыцар" — карацей, гэта падкаст пра кіно і каля таго.
5. Тутэйшы Шляхціч
Падкаст, прысвечаны асаблівасцям класічнага правапісу, ці, дакладней, Тарашкевіцы. Вы даведаецеся, што такое няканне, як адбываецца змякчэнне гукаў і чаму ўвогуле ў беларускай мове існуе некалькі правапісаў.
6. Беларускія Байкі
Знаёмства з мясцінамі, асобамі і прадметамі ўнікальнымі, як спосаб даведацца больш пра Беларусь — у маналогах Алеся Калбаскі, прафесара ЕГУ да яго ўнучкі. Сачыць за навінамі падкаста можна ў Тэлеграм-канале.
Больш спасылак, як і заўсёды, знойдзеце ў нас на сайце, а таксама падпісвайцеся на Тэлеграм-канал Беларускія падкасты з навінамі і звесткамі пра падкасты.
_
¹ Тэлеграм-канал падкаста Белліт на дадзены момант не належыць аўтарцы, таму не раім да яго далучацца.
#праекты
1.8K views07:42