2021-04-21 14:23:26
Папскі дабрачынны фонд ACN: Свабода веравызнання ў Беларусі апынулася пад пагрозай
Перспектывы сітуацыі з правамі чалавека, у тым ліку са свабодай веравызнання, у Беларусі застаюцца неспрыяльнымі. Так адзначаецца ў дакладзе каталіцкага дабрачыннага фонда ACN (Aid to the Church in Need — Дапамога Царкве ў патрэбе) са штаб-кватэрай у Ватыкане.
Маніторынг, праведзены ACN, ахапіў 2018-2020 гады. У 62 краінах, згодна з высновамі экспертаў фонда, мелі месца парушэнні рэлігійнай свабоды.
Варта зазначыць, што ACN імкнецца адсочваць максімальна шырокі спектр правапарушэнняў на рэлігійнай глебе, не канцэнтруючыся асаблівым чынам на рэпрэсіях з боку органаў улады. Але сабраныя фондам негатыўныя факты аб Беларусі датычацца менавіта ціску дзяржавы на вернікаў — прынамсі, хрысціянскіх канфесій.
Паводле высновы аўтараў даклада,
"Беларусь заціснутая паміж запатрабаваннямі шырокіх мас у дэмакратыі заходняга ўзору і дзяржаўнымі і міжнароднымі зацікаўленасцямі ў захаванні статус-кво ў рэгіёне". ACN адзначае, што падчас пратэстаў 2020 года Каталіцкая Царква падтрымала дэманстрантаў, а Беларускі экзархат Рускай Праваслаўнай Царквы адназначнай пазіцыі не выказаў.
"Замежныя і ўнутраныя гульцы імкнуцца падарваць аўтарытэт Каталіцкай царквы і распаліць гістарычныя рознагалоссі паміж праваслаўнымі і каталікамі", — зазначаецца ў дакладзе.
Сярод прыведзеных ACN фактаў абмежавання рэлігійных свабод у Беларусі — "крыжалом" у Курапатах, выгнанне арцыбіскупа Тадэвуша Кандрусевіча, адмовы ў працягванні віз каталіцкім святарам з Польшчы, адмовы ў рэгістрацыі шэрагу пратэстанцкіх суполак і іншае.
562 viewsedited 11:23