2021-03-13 15:47:45
Ксёндз Вячаслаў Барок разважае пра тое, як размаўляць з прыхільнікамі гвалту
"Паважаны кс.Вячаслаў! Дайце, калі ласка, параду, як знайсці агульную мову са сваякамі, якія падтрымліваюць дзеючую ўладу і іх жорсткія дзеянні. У пост трэба з усімі памірыцца і ўсіх прабачыць, але на гэта зараз не магу знайсці сілы... Дайце, калі ласка, хрысціянскі адказ! Упэўнена, тэма адносін са сваякамі з іншымі палітычнымі поглядамі, балючая для многіх!" (Таццяна)
<...> Каб знайсці агульную мову з апанентамі трэба найперш разабрацца ў сітуацыі і зрабіць тры крокі. Першым крокам выйсця з найгоршай сітуацыі, ў якой толькі можа апынуцца чалавек, з’яўляецца аб’ектыўная ацэнка той сітуацыі. Другі крок ‐ сфармуляванне прычынаў, якія прывялі да крызіса. Трэці крок‐ пошук адказу на пытанне, што я магу зрабіць: магу сітуацыю памяняць ці трэба мчняць сваё адносіны да сітуацыі.
1. Актуальная сітуацыя ў краіне сёння характэрызуецца феноменам масавых рэпрэсій ўладай сваіх апанентаў. Напэўна гэта ёсць рэалізацыя плану помсты “за нявернасьць у любві". Праблема велізарнейшая, бо чорнае называецца белым, белае чорным. Свядомасць чалавека разрываецца і міжволі чалавек сам задае пытанне, ці з ім усё ў парадку? Ніхто з нас не адчувае абароненасці і паволі знікае ўпэўненасць ў заўтрашнім дні. Хрысціянін не можа не заўважаць, як дзеецца сапраўдная трагедыя- руйнуюцца маральныя і асноўныя сацыяльныя каштоўнасці.
2. Прычынай, чаму адбылася эскалацыя насілля ў жніўні месяцы мінулага года, ёсць лагічнае завяршэнне будавання грамадства на асновах постсавецкай ідэалогіі. Лукашэнка, падчас штогадовых віншаванняў з нагоды 7 лістапада, запэўнівае, што мы будуем нашую будучыню на заваеваннях і ідэалах вялікага акцябра і ніякай дэкамунізацыі не будзе. Так вось, будуючы на камуністычных ідэалах, нічога іншага, як насілле ў выніку, не збудуеш. Акрэсціна, як сімвал ўсёй трагедыі гвалту і беззаконня, стала непазбежнай наканаванасцю, бо не было дэкамунізацыі і разлічэння за Курапаты. Курапаты – гэта ж адзін з сімвалаў камунізма.
3. Што магу зрабіць. Магу і сітуацыю мяняць і мяняць адносіны да сітуацыі. Зрэшты, мяняючы сітуацыю, будуць зменяцца і адносіны. І ніяк інакш. Небяспечна і не правільна мяняць само стаўленне да сітуацыі, не спрабуючы мяняць сітуацыю. Гэта шлях самападману і Ён прывядзе да яшчэ большай трагедыі. Спроба весці дыялог з іншадумцамі – гэта і ёсць маленькі крок у змене сітуацыі.
Вельмі добра, што незалежна ад нашага балючага досведу, не знікае жаданне размаўляць з іншым. І пачуваемся нават адказнымі за вырашэнне канфлікту. Гэта па-Божаму. Аднак, абсалютна не правільна мець пачуццё віны, калі не па нашай віне дыялог не атрымоўваецца. Бо, калі чалавек выбірае зло, гэта не мы нясем адказнасць за яго выбар. <...>
Безумоўна, дамовіцца з роднымі і сваякамі трэба старацца, але ж не коштам кампрамісу з праўдай. Такога дыялогу быць не можа.
Пры размове з палітычнымі апанентамі трэба прыкласці максімум старання, каб пачуць чужое нам меркаванне. Але і не меньш старання трэба прыкладаць да таго, каб сказаць і быць пачутым. Немагчыма за адну размову вырашыць усе пытанні. І дайсці да абсалютнага кансэнсусу. Аднак, трэба знайсці галоўныя пункты, якія нас аб’ядноўваюць.
Гэтым першым пунктам мае быць прызнанне эскалацыі насілля ў жніўні месяцы, у чым сілавікі бралі самі беспасрэдны ўдзел. І мы гэта ўсе бачылі.
Некаторыя не прызнаюць горкай праўды. Калі чалавек пачынае казаць, хто там ведае, як было і што было... Адказ можа быць толькі адзін – аргументацыя пры дапамозе фактаў. Варта паказваць відэа пра збіццё мірных грамадзян, здымкі і г.д. Чуеце ў адказ "так і сілавікі пацярпелі"- прасіце, каб паказалі Вам відэа збітых або пакалечаных сілавікоў. Дзякуй Богу, гэтага няма. Калі ж дзе і было, трэба згаджацца з тым, што мае быць разбіральніцтва і суд. Але суд згодны з законам, а не тое, што адбываецца ў нас. Толькі праўда і аб’ектыўнасць могуць легчы ў аснову паспяховага дыялогу. Не бойцеся згубіць часова сувязь з сваімі роднымі і сябрамі. Бойцеся паступіцца праўдай.
705 views12:47